Të mësosh gjeografinë në shkollë do të thotë të formosh qytetarë të ndërgjegjshëm, të pavarur, të përgjegjshëm e me ndjenjë kritike, që të dinë të bashkëjetojnë në mjedisin e tyre dhe të dinë ta shndërrojnë në mënyrë krijuese dhe të përshtatshme, me vështrimin drejt së ardhmes. 

Gjeografia italiane ka si bosht kryesor të hulumtimit shkencor Universitetin, ku punojnë më shumë se 400 profesorë (të ndarë në Sektorët e Gjeografisë së përgjithshme dhe të Gjeografisë ekonomike e politike). Rreth 150 janë profesorët e Sektorit të Gjeomorfologjisë dhe të Gjeografisë fizike. Docentëve u shtohen të rinjtë e shumtë që kryejnë Doktoraturën.

            Shoqata e Gjeografëve Italianë (AGeI) përmbledh pjesën më të madhe të profesorëve universitarë.

Studentët e interesuar mund të gjejnë në Universitetet italiane kurse të ndryshme, që kanë Gjeografinë si pikë referimi domethënëse. Zhvillohen dhe kurse të veçanta për këtë lëndë.

Kurse trevjeçare për Gjeografi janë aktive në universitetin e Bolonjës, Firences, Gjenovës, Milanos, Padovës, Piemontes Orientale, Romës e Torinos.

Kurse dyvjeçare (ose për specializim) për Shkencat gjeografike janë aktive në universitetin e Bolonjës, Firences, Gjenovës, Milanos, Pizës, Romës e Torinos.

Veprojnë edhe dy shoqata të rëndësishme historike, Shoqëria Gjeografike Italiane (SGI) e Romës dhe Shoqëria e Studimeve Gjeografike (SSG) e Firences, të krijuara me qëllimin e promovimit dhe përhapjes së studimeve shkencore dhe të aktiviteteve të disiplinave gjeografike. Institucione të tjera, në sektorin gjeografik dhe kartografik, janë: Instituti Gjeografik Ushtarak, Shoqata Italiane e Kartografisë, Touring Club Italian.

Në sistemin shkollor italian Gjeografia mësohet që në kopsht (p.sh. njohuritë fillestare të botës) dhe më pas në shkollën tetëvjeçare (5+3). Cikli i parë i mësimit bën pjesë në fushën historiko-gjeografike. Në shkollën e mesme (5 vjet) Gjeografia zë një hapësirë të pamjaftueshme, sidomos në dy vitet e para.

Një lidhje e rëndësishme midis shkollës dhe hulumtimeve shkencore realizohet nga Shoqata Italiane e Mësuesve të Gjeografisë (AIIG), që përmbledh docentë të disiplinave gjeografike të të gjitha niveleve shkollore. Ndër qëllimet kryesore të Shoqatës është promovimi i mësimdhënies, përhapja e edukatës dhe e kulturës gjeografike, mbështetja e njohjes dhe e mirëkuptimit ndërkombëtar si dhe e së drejtës të të gjithë popujve për zhvillim.